Poppuð færsla

Síðan ég hætti að eiga geislaspilara og keypti ipod hef ég ekki haft jafn gaman að tónlist og áður. Mér finnast geisladiskar miklu eigulegri heldur en stakir mp3 fælar. Þetta rifjaðist upp fyrir mér þegar mamma kom með geisladiskasafnið mitt um daginn. Ég hlýt að hafa eytt bróðurpartinum af unglingaríkidæminu í geisladiska. Þeir eru ansi margir. Sumir eru eftir virðulega tónlistarmenn sem er verjandi að hlusta á. Flestir falla ekki í þann flokk.

Ég á óteljandi söngleikjadiska. Þegar söngleikjatímabilið mitt reið yfir kunni ég best við þá söngleiki sem þóttu ekki einu sinni nógu góðir til að sýna á Broadway. Síðan las ég lýsingar á söngleikjunum á netinu og giskaði í eyðurnar.

Restin af diskunum er aðallega með píkupoppssöngkonum. Ég á til dæmis heila átta diska með Mariah Carey. Á ákveðnum tíma í lífinu komast flestar stelpur að því að allt sem þeim finnst skemmtilegt og kúl er í rauninni mjög hallærislegt. Ekki síst tónlistarsmekkurinn. Ég faldi yfirleitt diskasafnið mitt þegar vinir mínir komu í heimsókn.

Nokkru seinna þegar ég fór í menntaskóla lenti ég í rifrildi við einhverja stráka um það hvort ákveðnar poppsöngkonur hefðu næga hæfileika til að mega flíka þeim. Þeim fannst þær svo miklir aular að semja ekki einu sinni tónlistina sjálfar á meðan miklir listamenn sem þeir þekktu persónulega gátu ekki einu sinni lifað af list sinni. Og þótt þessar gellur "væru kannski skrifaðar fyrir hinum og þessum lögum" þá var það bara eitt stórt blöff. Á bak við eina konu hlutu að vera nokkrir karlmenn sem sömdu öll lögin.

Það er nú kannski meira en lítið til í því að píkupopptónlistarheimurinn sé kynjaður en mér finnst ömurlegt að bæta því við söngkonurnar í honum séu hæfileikalausar. Auk þess er ekki eins og utan vinsældapoppsins ríki jafnrétti.

Um daginn sá ég viðtal við upptökustjórana sem ætla að gefa út disk með Lay Low. Sú er nú ekki lítið talent. Mér fannst samt viðtalið við upptökukallinn heldur asnalegt. Hann hélt því fram að fyrir Lay Low hefði ekki fyrirfundist íslensk söngkona sem væri ekki bara söngkona heldur tónlistarhöfundur og hljóðfæraleikari. Er hann einhver vanviti? Kommon...